22. október 2014 - Um vélbyssur

Nú þegar ljóst er að lögreglan hefur orðið sér úti um vélbyssur til að nota við skyldustörf má velta fyrir sér hvenær þær  aðstæður verða sem krefjast notkunar á slíkum drápstólum.

Reynum að ímynda okkur aðstæður.  Það gengur bjarndýr á land í Skutulsfirði og ætlar að gæða sér á leikskólabörnum í Ísafjarðarbæ.  Þá væri nú ekki amalegt að lögreglan á Ísafirði væri vopnuð vélbyssu. Eða hvað?  Hversu mörg leikskólabörn væru þá fallin áður en bjarndýrið fellur?  Nei, vélbyssan hentar ekki við slíkar aðstæður. Þá er öflugur riffill með góðu miði miklu betri.

Ökumaður ekur á hest og særir hann alvarlega og lögreglan kemur á staðinn, grípur vélbyssuna og veitir hrossinu náðarskot. Mörg slík til að tryggja fljótan dauða dýrsins.  Þarna gildir sama og áður.  Góður riffill er miklu betri.  En ef ökumaðurinn ekur á hóp kinda og særir margar. Þá væri ekki amalegt að vera með góða vélbyssu og slátra greyjunum öllum með einni skothríð.  Ætli kindabyssan væri ekki ódýrari og betri við slíkar aðstæður?

Sama gildir ef geðsjúkur brjálæðingur missir stjórn á sér. Hættan verður miklu meiri sé vélbyssan með í för. Mun einfaldara og hreinlegra er að skjóta vesalinginn með riffilskoti þótt ætla megi að nær væri að skjóta manninn með deyfilyfi.

Það er nú ekki amalegt að vera með vélbyssu á rjúpnaveiðum þótt hún gagnist ekki við hreindýraveiðar. Það væri hægt að ná mörgum rjúpum með einni skothríð og þá ekki amalegt að vera með góða vélbyssu við fækkun máva á Tjörninni.  Eða hvað?  Alltof róttæk aðferð.

En einhver not hljóta að vera fyrir 150 vélbyssur sem lögreglan keypti óvart af lögreglunni í Noregi því sögur þess efnis að Norðmenn hafi gefið Íslendingum þessi vopn eru ótrúverðugar. Reyndar má geta þess í leiðinni að þjóðtrúin segir að það fylgi böl því að gefa vopn hvort heldur um er að ræða hnífa eða vélbyssur.

Jú, það eru not fyrir vélbyssur á Íslandi, t.d. ef lögreglan þarf að sýna þeim sem mótmæla ríkisstjórninni hver það er sem ræður eða ef einstakir lögreglumenn ætla að fremja fjöldamorð. Þá er nú ekki amalegt að vera með vélbyssur svo hægt sé að drepa sem flesta í einu.

Sem betur fer þekki ég engan lögreglumann sem er svo illa þenkjandi að verða fyrstur til að skjóta við slíkar aðstæður.